ابقي سَمِّي يا قصيدة واكتبيني...

تميم البرغوثي

أَنَاْ مُفتاحْ مَزْنُوقْ في البابْ

عايز بعدِ كده تْقولْ إيه

عايز أقول أنا لسَّه شباب

 وده ماله باللي قبليه

عايز أقول ان انا مزنوق

من قبل ما شب عن الطوق

أو طوقي بيشب معايا

وكإنه في سبق ويايا

باجري وراه وبيجري ورايا

باجري كأني باجري في حلم

أو على آلة جري ف جيم

 باجري في مكاني ما بكبرش

زمني متمسمر جنبي

وكأنه زمني ذنبي

وسلاحفه راكبة أرانبي

ماستعجلش ولا اتأخرش

رغم الرهبة ورغم الشوق

أنا مفتاح في الباب مزنوق

انا  مفتاح مزنوق في الباب

طيب طيب

عايز بعد كده تقول إيه

عايز ألفت نظر الناس

عن معنى المفتاح في الباب

وعن الزنقة والترباس

لو قلنا الباب يعني تاريخ

تبقى الزنقة دي مظاهرات

والمفاتيح تلبس طلاب

واذا غيرنا معنى الباب

وعملناه معرفة إلهية

يبقى المفتاح صفو النية

ويمكن ياخد صفة نبوية

والشك الزنقة المصيرية

والحيرة ف معنى الأبدية

نكتب عنها ألف كتاب

كلها متقسمة أبواب

مفاتيحها لأولي الألباب

ونهاتي ف خلافات فكرية

طايفة رضية وطايفة شقية

ترباسية ومفتاحية

بين المؤمن والنصاب

وإن غيرنا الصورة تماماً

وجعلنا للباب قضبان

تبقى الزنقة بني الإنسان

والمفتاح شعر وأغنية

بيمنونا بالحرية

كذبة لكن مش مؤذية

واش دراك يمكن مش كذبة

وتطلع صدق المرة الجاية

وإذا قلنا القضبان رمزية

وحطينا وراها البشرية

وعومنا السجن على المية

تبقى الحسبة غير الحسبة

القضبان قضبان في سفينة

بتنجي الكون م الفيضان

موزونة يا سفينة نوح

موزونة بين ضحك ونوح

وانا شيخ طائفة المجانين

مش لادة علينا الموازين

هربانين م المية لكين

للمية احنا مشتاقين

بنحاول نفتح في الباب

وان غرقت مش فارقة معانا

دنيا نجاتها في طوف أخشاب

تبقى دنيا مش نافعانا

يا مولانا يا منجينا

ومعبينا في قلب سفينا

ما تعلمنا نعوم يا أخينا

كله يعوم مطرح ما هو عايز

نهرب م الواقع للجايز

كل زوجين مفتاح للدنيا

إمكانية لدنيا تانية

فيها الخاسر فيها الفايز

مفاتيح فكت من سلاسلها

وبتخلق أبواب منازلها

عومها يا سيدنا وادعيلها

يفتحها علينا الفتاح

وانا في الباب مزنوق مفتاح

وانا مفتاح مزنوق في الباب

طيب ما تنورنا كمان

عن زنقة ومفاتيح وبيبان

 خلينا أكثر واقعية

خلي قصيدتك قمع عظيم

تنزل م الواسع للضيق

بدل البشرية ابقى تميم

قاعد ع القهوة بيتريق

قول للقارئ إنك باعته

عامل فيه مقلب يا لئيم

بتعلمه فن التنجيم

والمحروس لو مشي يتزحلق

انزل من سقف التعميم

لساعاتي بيبص ف ساعته

غاليه عليه الساعة بتاعته

في معزة ولده وجماعته

ساعة الحشر لابسها في إيده

ساعة الحشر لكن بتزيق

عايزة لها شوية تشحيم

برضك ما نتاش عارف تثبت

في مكانك من غير مجازات

إدي مجازاتك أجازات

خلي ساعاتك بس ساعات

وابوابك أبواب عمارات

والنسوان مش رمز لحاجة

مخلوقات من جلي رجراجة

اللبناني اظرف م المصري

أصله بيمشي صريح متعري

زيه زي المعنى الشعري

مش كاسياه الإستعارات

انزل للجزئي من الكلي

بدل الدنيا اوصف في الجيزة

بدل العجز أوصف في عجيزة

افتح عينك بس وقللي

شايف إيه ف بلدك يا خواجة

واللي هايتفذلك كداب

أنا مفتاح مزنوق في الباب

مش عارف أخرج ولا أخش

قاعد أبص على الأحباب

والصبح بيطلع في البيت

اللي بياكل فول بالزيت

واللي لسه هتاخد دش

واللي بيقرا في الفنجان

واللي بيشرب في الجرنان

واللي بينفخ نفخ بذمة

قاري كتب تبدو له مهمة

مضمونها انه عنده مهمة

يفضل ينفخ حتى القمة

لاجل يوسع أفق الأمة

زي البلالين الألوان

يمكن أفق الأمة يفرقع

ويدوب جوة الأفق الأوسع

والدهر الماشي على أربع

يتكلم عربي بإتقان

واللي بيتوضا ويصلي

بيدور في الأصل الأصلي

على عرق الدهب المتجلي

في الأربيسك وفي القرآن

فيلاقي سيراميك كيلوباترا

يزعم إنه هنا من فترة

ويقول له اتكلم فرعوني

بس لاتيني أو سكسوني

فيناديه الشيخ بسيوني

والشيخ فتح الباب التوني

وطنك ده فشر نابليوني

فرعونك ما نتاش محتاجه

في فرنسا متعاد إنتاجه

بالبشكير على وسطه وتاجه

شاحنينه بكتالوج وضمان

وإيديه خلف خلاف على صدره

بعلامة أستفهام ومنشة

كل عواطف أمه وفكره

يبني عرش دهب على عشة

والعشة حيطانها خرزان

فيه فرعون جنبه كركوب

إسمه السيد رفعت بيه

طالعة مراته بالمركوب

تجريه وراه مش عارف ليه

ده بقى يا سيدي فرعون بلدي

مش واخد كارت نابليون

ده فرعون متبهدل أبدي

ما لهوش غير إسم الفرعون

عرشه على القهوة مكفيه

أعدل بني آدم في الكون

لو كنت إله كنت اتبناه

وما كنتش أتبنى سواه

لا هايديني مال ولاجاه

بس كفاية النكتة  عليه

طيب غيرهم شايف إيه

شايف شرطي قبض على روحه

وحرامي بيسرق  من نفسه

دولة رافعة علم على ميضا

بتلاتِّ ألوان كلها بيضا

ثم الميضا مالهاش جامع

واللي بيتكلم بيتهته

واللي بيسمع له مش سامع

وما فيش واحد جاي يتوضا

كله جي يبل شراب

يمسح بالمية اللكعاب

كله عايز يبقى خراب

واللي مش عايز، بالعافية

كلب تاريخ عض الجغرافيا

عملوا بلد في حدود العضة

وبقىلها حكومة ومعارضة

وعملات ورقية ومن فضة

وبلدنا مظاهرة منفضة

وصلاة جمعة ما هياش جامعة

وإمامنا مش حسن السمعة

أهي جمعة يا عم وتتقضى

ونصلي ونقيد الشمعة

مش أملاً والا رومانسية

لكن عادة ومش ها تضر

مستحلينا الزمن المر

ويعدي أدان بعد أدان

 ثم يمر شريط متسارع

تتسابق فيه الأزمان

تدبل فيه الشقة تماماً

والناس تتحول أشباح

وتغطي العفش البياضات

ويغطي بياضاتها تراب

وانا مفتاح مزنوق في الباب

نكد البشرية وأزمتها

مطرة نازلة بعزم ما فيها

وانا وحدي واقف تحتيها

عامل شعري قمع عظيم

 رافعه فوقي كما الشمسية

طبعاً مش بيحوش المية

بيركزها بس عليا

فأشيل انا هم البشرية

وأترجمه في هموم تفاصيلي

في زعل البنت وضحكتها

في حر الدولة وزحمتها

مصر مجاز عن كرشة نفسي

وعن كرشة نفس الإنسان

تلاوتها وترتيلها الكنسي

ووساختها والدبان

لازم أسيبها عشان أغلبها

واكتب شعري بدون ما اكتبها

أهرب منها وأهربها

مصر مجاز عن كرشة نفسي

لما أوصف حال الدنيا

تشبيهاتي بتبقى طابور

تيجي مصر بكتف جلنف

ترمي كلامي هنا وهناك

وتقف في الأول بالعنف

مش هتخلي لي ولا حرف

كده مصر بستعمر لغتي

لازم أطردها من الصف

أخرج م الجزئي للكلي

مصر مجاز عن كرشة نفسي

هاختم بيها آخر مرة

عشان اخرج م الجرة لبرة

ميت مرة تسلمي يا جرة

وانا ما سلمتش منك يوم

مصر يا قمع يا تحت المطرة

إزاي تحشي القمع غيوم

أنا مزنوق في الباب من فترة

مش مسموع تخبيطي وجرسي

مزنوق في تشبيهي مالمصري

مصر مجاز عن أزمة شعري

مصر مجاز عن كرشة نفسي

مصر مجاز عن خنقة جيلي

محتلة خيالي وتحليلي

وعايصة أفق الأمة هباب

وانا مفتاح مزنوق في الباب

يا مصر المرة دي بجد

ومانيش هاترازل على حد

ولا اقول لما اطلع رجعني

أنا هنا هو لازمتي إيه يعني

مش عارف اساعد أخواتي

ولا همه قدروا يساعدوني

حتى شعري شعر ذواتي

أبياته بالفصحى يجوني

يعني أنا بغير أبياتي

وباحضر منظر رحلاتي

ومكانتي في الزمن الأتي

وضعي هنا وضع أبو الطيب

هو شتم لكن أنا طيب

قاعد ولا قوة ولا حولة

ومحاولة تودي لمحاولة

تاني اطردني يا أمن الدولة

إنت كسبت يا عم الجولة

إنت القفل تملي معاك

خلينا لك مصر هدية

بس ابقى ادعي ربي يعينك

مصر يا بيه ها تطلع عينك

أما الطرد فهايحررنا

وينضف منك أفكارنا

وانت انشا الله ها تعرف بكرة

إنه شرط الفتح الهجرة

وأنه مصر برغم كالونك

يا قفل الدولة وقانونك

مبنية بمليون شباك

ياللي سانن ضفر وناب

عرقك زي الزيت المغلي

خاف لا يجيلك هارت أتاك

في خيال الشعرا وفي لاظوغلي

يا متحصن في الأبواب

إسمع كلمة وفصل خطاب

من مفتاح مزنوق في الباب

إنت أقوى منا صحيح

وعملنا هايروح في الريح

بس الريح يا ابو مخ صفيح

راح تغزيك من غير مفاتيح

في العالم العربي تعيش

كما قط ساكن تحت عربية

عينيه ما تشوفش م الدنيا دي حاجة الا الجزم

في العالم العربي تعيش

كما بهلوان السيرك تحتك بهلوان دايس عليه

وفوق دماغك بهلوان دايس عليك

والكل واقف محترم

في العالم العربي تعيش،

مباراة بقى لها ألف عام

لعيبة تجري يمين شمال

والكورة طول الوقت في إدين الحكم

في العالم العربي، تقول للبنت حبيتك

وتبقى البنت بتحبك، وبتموت فيك

تناولك بالألم

في العالم العربي تعيش

تشتم في طعم المية والطعمية والقهوة وروادها وفى مراتك وأولادها وحر وزحمة الأتوبيس

وفي اللي بيعمله إبليس، وفي التفليس

ولو سألوك تقول الحمد لله ربنا يديمها نعم

في العالم العربي تعيش، كما دمعة في عيون الكريم المحنة تطردها يرجعها الكرم

في العالم العربي تعيش تلميذ في حوش المدرسة من غير فطار عينه على  الشارع وبيحيي العلم

في العالم العربي تعيش، بتبص في الساعة وخايف نشرة الأخبار تفوت

علشان تشوف ع الشاشة ناس

في العالم العربي

تموت

أنا نملة واقعة ف رغوة الصابون
قاعد أرَفَّس هل أكون أو لا أكون
مجنون
لا في تحتي أرض اسند عليها
و لا ف إيديا حاجة أمسك فيها
أصرخ الحقوني يا ناس ح أموت
،نَفَسي اتقطَع و لا حدَّ حاسس بيّا
،ملغي من الحساب
و كأن ربّي حطّني ع الأبجدية سكون
ما أنا نملة واقعة في رغوة الصابون
* * *
و الرغوة من حَوَالَياَّ كبرت
زي مارد لسه سايب قمقمه للتو
واقف يطقطق ضهره و يشمّ الهوا
رِجلُه أمامي و راسه فوق في الجَو
بيبُص لي كده باحتقار
و أنا في الكرامة مفيش هزار
أنا قلت أزعق فيه فتحصل معجزة
يمكن إلهي يسخطه مثلاً أو انه يختفي
،و ما هوش بعيد على ربنا
،تبقى تراجيديا تتقلب كرتون
ما حصلش طبعاً للأسف
و فضلت نملة ف رغوة الصابون
* * *
نفش الصابون أصبح ميدان تحرير
و من الرغاوي وقف مجمّع و البشر طوابير
إشارات مرور زحمة و زفّة ماشية بالزمامير
باليل تلاقي الإعلانات وَيّا المثقف
قايمة بالتنوير
و الحُكم للون الرمادي
المنتخب بالإختيار الحر للجماهير
جماهير
إذا ما شفتها لما تقوم الصبح
من نومها و تسعى لشغلها
دقَّق على الكفين و في الرجلين
تلاقي مطرح المسامير
يا ميدان سخيف
كما حصة التعبير
يا ساطور مخيف
فوق البشر مسنون
أمرك و أمري يهون
ما أنا في النهاية نملة و انت رغوة الصابون
* * *
نَفَش الصابون أصبح بلاد عربية
مصحف شهيد رايح يرُدّ الضيم
عن أرض العرب
مصحف ذهب
بيمرجحه صدر البنيَّة ف سلسلة دهبية
يا بلاد عجب
هزيمتها قطعة عفش جُوا كل بيت أساسية
زي الستاير و الكَنَب
،أمة رغاوي بس أحزانها حديد
مَلوِي و متزخرف كأبواب القصور
و الموت يهاتي مشغّلينه مسحراتي
يلف ف كل الشهور
مش بس شهر الصوم
إصحوا بقى من النوم
أو نامي نامي للأبد يا عيون
يا أمة ساكن فيها لكن بيها أنا مسكون
أمرك و أمري يهون
ما أنا في النهاية نملة و انتي رغوة الصابون
* * *
نَفَش الصابون بقى هوَّ هوَّ الكُون
إطلع على القمر الصناعي و شوف
تلاقيها ورطة و كلّنا فيها
و ما لكش مهرب منها غير ليها
ما تشوفش من حواليها إلا سواد
و خلطة من العدم و الخوف
نقطة و طايرة في الهوا
يا نعيش سوا يا نموت سوا
كوكب لوحده قوي
كأنه طفل تاه من أهله
أو مخطوف
إنزل من القمر الصناعي و شوف
شوف بهلوان
وشّه سبع ألوان
عمل سلطان
قعد ع العرش
يحكم عليك، تضحك تقول ده هزار
و تُدرك لما يبقى الدم منك للركب
،إنه ما بيهزرش
شوف الأمل يوجع
كما الروماتيزم في العضم العجوز
،شوف بحر مالح
لو تعوز تشرب
و لو تشرب تعوز
يا سيرك يا للي اسمه اصطلاحاً كون
يا ضخم يا زغَنّون
أمرك و أمري يهون
ما أنا في النهاية نملة و أنت رغوة الصابون
* * *
نَفَش الصابون بقى موت
جاي لي بيجري فاتح الأحضان
أهلاً و سهلاً يا حَنون
إنشلني من دي الورطة
و ابقالك أنا ممنون
ما تخافش من دِيّة و لا من تار
ده أنا و الله قليل العون
خدني و أمري يهون
،ما أنا في النهاية نملة و انت
،حتى انت
رغوة صابون

قالولي بتحب مصر فقلت مش عارف

قالولي بتحب مصر فقلت مش عارف

المعنى كعبة  وانا بوفد الحروف طايف

وألف مغزل قصايد في الإدين لافف

قالولي بتحب مصر فقلت مش عارف

أنا لما اشوف مصر ع الصفحة بكون خايف

ما يجيش في بالي هرم ما يجيش في بالي نيل

ما يجيش في بالي غيطان خضرا وشمس أصيل

ولا جزوع فلاحين لو يعدلوها تميل

حكم الليالي ياخدهم في الحصاد محاصيل

بيلبسوهم فراعنة ساعة التمثيل

وساعة الجد فيه سخرة وإسماعيل

ما يجيش في بالي عرابي ونظرته في الخيل

وسعد باشا وفريد وبقية التماثيل

ولا ام كلثوم في خمسانها ولا المنديل

الصبح في التاكسي صوتها مبوظه التسجيل

ما يجيش في بالي العبور وسفارة اسرائيل

ولا الحضارة اللي واجعة دماغنا جيل ورا جيل

قالولي بتحب مصر أخدني صمت طويل

وجت في بالي ابتسامة وانتهت بعويل

قالولي بتحب مصر فقلت مش عارف

لكني عارف بإني إبن رضوى عاشور

أمي اللتي حملها ما ينحسب بشهور

الحب في قلبها والحرب خيط مضفور

تصبر على الشمس تبرد والنجوم تدفى

ولو تسابق زمنها تسبقه ويحفى

تكتب في كار الأمومة م الكتب ألفين

طفلة تحمي الغزالة وتطعم العصفور

وتزنب الدهر لو يغلط بنظرة عين

وبنظرة أو طبطبة ترضى عليه فيدور

وأمي حافظة شوارع مصر بالسنتي

تقول لمصر يا حاجة ترد يابنتي

تقولها احكي لي فتقول ابدأي إنتي

وأمي حافظة السِيَر أصل السِيَر كارها

تكتب بحبر الليالي تقوم تنوَّرها

وتقول يا حاجة إذا ما فْرِحتي وحزِنتي

وفين ما كنتي أسجل ما أرى للناس

تفضل رسايل غرام للي يقدَّرها

أمي وأبويا التقوا والحرّ للحُرَّة

شاعر من الضفة برغوثي وإسمه مريد

قالولها ده أجنبي، ما يجوزش بالمرَّة

قالت لهم ياالعبيد اللي ملوكها عبيد

من إمتى كانت رام الله من بلاد برَّة

يا ناس يا أهل البلد شارياه وشاريني

من يعترض ع المحبة لما ربي يريد

كان الجواب إن واحد سافر اسرائيل

وانا أبويا قالوله يللا ع الترحيل

دلوقت جه دوري لاجل بلادي تنفيني

وتشيب أمي في عشرينها وعشريني

يا أهل مصر قولولي بس كام مرة

ها تعاقِبوها على حُبَّ الفلسطيني

قالولي بتحب مصر فقلت مش عارف

بحب أقعد علىالقهوة بدون أشغال

شيشة وزبادي ومناقشة في مآل الحال

وبصبصة ع البنات اللي قوامهم عال

لكن وشوشهم عماير هدها زلزال

بحب لمعي وعب هادي ومحب جمال

أروح لهم عربية خابطة في تروللي

كإنها ورقِة مِسوِدَّة مرميَّة

جُوَّاها متشخبطة ومتكرمشة هِيَّة

أو شلِّةِ الصوف، أو عقدة حِسابِيَّة