قبل أن تجهزوا بالرد أكملوا الموضوع و سيكون بلهجتى المحلية (و ﻷول مرة منذ فترة) فليسامحنى اﻷخوة العرب أن كانت هناك ألفاظ غير واضحة لهم.

وصلنى رد غريب و عجيب على موضوعى اللى فات اللى هو مش موضوعى أساسا لكن هو نقل لمجموعة فتاوى عن شم النسيم (بمناسبة أنه قرب).

الرد من نفس الزائر اللى قال سابقا على الشيخ سفر الحوالى :

"ينفع تقرا عن الإسلام من كتاب كاتبه مبشر بروتستنتي!"

لكن الرد المره دى طويل شوية و يحتوى طبعا على بعض الجمل المنمقة الجميلة اللى تشد الواحد و بصراحة أنا أول ما خلصت قراءة الرد أنفجرت من الضحك (هتعرفوا بعد شوية ليه).

أول حاجة شدتنى فى الرد هو أنى مش قادر أفهم هو صاحب الرد واخد باله أن الموضوع منقول و لا ﻷ, ﻷنه حط فى اﻵخر جملة شكلها كده يقول أنه واخد باله أما قبلها فبيوجه لى الكلام كأنى أنا صاحب الردود و الفتوى و كأنى أنا من كتبت الموضوع اﻷصلى على الرغم من أنى حاطط رابط الموضوع اﻷصلى فى التدوينة قبل ما أنقل منه حاجة, يعنى مثلا بيقول :

"و ردا على سؤالك الاستنكاري "[...] وهل استنشاق الريح الطيبة له موسم معين حتى يتخذه الناس عيدًا [...]"
فمن يقرأ هذا يظن أن مناخ مصر هو ربيع دائم طوال العام!
ها نحن في الربيع المفترض و درجة الحرارة اليوم أكثر من 40 مئوية!"

و أيضا :

"من تحريمك الاحتفال بمولد النبي استنتجت أنك سلفي لذلك أفهم أن ترفض مبدئيا شم النسيم لكن هذا رأيي."

ما علينا من اﻷقتباس اﻷولانى لكن التانى هرد عليه فى جزئية سلفى و لا مش سلفى و أقول أنى أساسا أرفض فكرة التقسيم و اﻷلقاب فلا أحب كلمة مسلم سنى أو مسلم سلفى أو مسلم وهابى أو ......... و ببساطة أنا مسلم فقط.

و بالمناسبة هى سلفى دى عندك حاجة عيب و لا حرام ؟

ثم الجملة اللى حيرتنى و بتقول :

"العقل أبدى من النقل"

يعنى شايف أنه منقول و بيكلمنى أنا !

طيب و أحب أضيف حاجة كمان و هى أن طالما عقلى تقبل الموضوع يبقى مفيش مشكلة فى نقله لمدونتى (حد عنده مشكلة :D ).

ما سبق ليس الهدف من التدوينة و كمان مش أستهزاء بالتعليق (الجزء ده منه) و لكن توضيح لأستغرابى.

نيجى بعد كده ﻵخر حاجة و اللى خلتنى أنفجر من الضحك و اللى فكرتنى على طول بموضوع الشيخ سفر الحوالى :

"على صعيد آخر
و فيما يتعلق باللافتة منهاضة البهائية التي تضعها، و رابط موقع محمد حسان، فإن هذا المسلك يذكرني بمن يقرأ عن الأسلام من كتاب لقسيس أمريكي بروتستانتي ليعرف عن حقيقة الإسلام. بالذمة دا كلام يا رجل!"

فعلا يا راجل معاك حق ده محمد حسان هو كمان طلع بروتستانتى بس المرة دى قس مش مبشر !

تصدق أنا مكنتش واخد بالى أن كلهم كده !
يعنى على كده بقا أبى أسحاق الحوينى و القرضاوى و الغزالى و الشعراوى و غيرهم قساوسة بروتستانت ؟
و محمد قطب و محمد عمارة نقول عليهم مبشرين بروتستانت كمان ؟

الا بالمناسبة هو ليه كلهم بروتستانت ؟
يعنى مفيش حد من نفسنا كده يطلع كاثوليكى أو أرثوذكسى أو تبع شهود يهوه أو نقلب على اليهود و يطلع لنا حاخام يهودى خريج من اﻷزهر ؟
يعنى نوع لنا شوية علشان منزهقش ;)

و لا أنت عندك تفسيرات تانية لكلمة كـ قس بروتستانتى أو مبشر بروتستانتى ؟
يعنى لكون ظلمتك و لا حاجة ؟

و نحب نعرف ايه هى مواصفات الشخص اللى نقرأ له علشان نعرف عن اﻷسلام ؟

و لما نحب نقرأ, نقرأ مثلا فقة السنة لفيفى شخلع أو تفسير القرآن لزعبله المطبلاتى .... عفوا ضابط اﻷيقاع ؟
و لما نحب نستفتى حد فى أمور الدين و الدنيا نسأل بقا مين ؟ ...... كاتب صحفى من المولعين بالمذاهب الحديثة و المشهورين بكتر الكلام الفلسفى الجميل اللى يخلى أى أنسان بسيط يدوخ من القرأة ؟

بالمناسبة كمان هو الرابط اللى أنت شايفه لموقع محمد حسان ؟

و زعلان على البهائية قوى ؟
ايه عايزنا نعترف بيها ؟ طيب ايه رأيك بقا نعترف بأى ديانة أتعملت علشان تهدم فى مجتمعاتنا ؟
حتى لو أسمها السبعاوية بنز ؟

و على صعيد آخر بس آخر عن اﻵخر بتاعك : إن شاء الله هبقى أرفع شوية كتب قريب -أو على حسب وقتى- فمتنساش بقى لو حبيت تعلق تبقى تنوع زى ما أتفقنا ;)

فى اﻵخر عندى لك كلمتين, اﻷولى سأحتفظ بردك الرهيب الى اﻷبد كنسخة من الردود الغريبة المضحكة و المبكية و لكن لن أظهره ﻷن لا هدف منه (كلام كتير كله مردود عليه و واضح بالفتاوى المنقولة و اللى معاها رابط لموضوع تانى عن فتوى خاصة بعيد الحب و طبعا أنا حاطط الرابط لهدف ﻷن الموضوع فيه حاجات مهمة زى جزئية علة النهي عن التشبه بالكافرين) و الثانية :

حسبى الله و نعم الوكيل

و السلام عليكم و رحمة الله و بركاته

تحديث : و ضعت جملة (ليست حقيقة, أقرأ الموضوع بالكامل أولا) بأول العنوان علشان نتائج البحث فى محركات البحث.