وسوم » بيتزا

البيتزا بطريقتي ... PIZZA PIZZA

 يوم جمييييل

كيف الحال يا صبايا

اليوم انا ضيفه في قسم kitchen

حبيت اسوي شي سريع وبسيط عشان ما تقولو ما تعرف تطبخ

فقررت اعمل بيتزا بالخضار بحبببها كتير

بدخل في الموضوع على طوووول

طبعا مقادير العجينه نفسها اللي نزلتها اختي قبل فتره

الرابط  هـــــــنا

طبعا العجينه دي مررره طعمه واعتمدتها من يوم عرفتها

كنت احوووس في العجينه وما تزبط معايا

اذكر مرره قلت بسوي بيتزا وعجنت وطلعت العجينه بسكووت لووول

وبعدها قررت ما اسوي شي لين عرفت العجينه دي

المهم هنا صوره العجينه بعد العجن

وهنا بعد ما اتخمرت شوفو كيف انتفشت

ملمسها جدا طري وناعمه

نجي لمكونات البيتزا

فلفل رومي بألوانه اصفر واحمر وبرتقالي وفلفل رومي اخضر بحب اكتر فيه شويتين لونه جميل  … رجعنا للمكياج  مع الألوان

حبه طماطم متوسطه الحجم

حبه بصله صغنونه

 زيتون اسود ما احب الزيتون اللي معلب مو صحي كتير

وبعد ما حولت صحيه شويتين شطبت المعلبات كلها

الزيتون المستخدم الزيتون اليوناني لزززيز

استخدمت جبن الموزاريلا  وجبن تشيدر بشرت ربع منها مو كلها

احب التشيز زياده حبتين

نجي دحين لمقادير الصلصله

حبه ماجي و نص كرتونه صلصه السعوديه

وفلفل اسود وكمون مطحون وكزبره مطحونه وبهارات ايطاليه

ما اتقيد بمقادير معينه في البهارت بحط ع النظر او بالبركه زي ما يقولو

واضيف عليها شويه مويه واحطها ع النار من 5 الى 7 دقايق وخلاص

وكدا يكون شكلها النهائي

بعدين اشيل العجينه تكون اتخمرت في دي الفتره وافردها

دحين وقت التزيين

طبعا قبل ما ادخلها الفرن كدا شكلها انا حطيتها في اكبر صينيه عندي

ودهنت الصينيه شويه زيت

وسخنت الفرن لا تقولو على كم ما اعرف لأنه بعتمد على النظر

هنا شكلها جمييلتي بعد ما طلعت من الفرن واكتسبت شويه برونز على تحميصه

تووحفا التعبير لووول

سوري ما امداني اسوي لقطات ابداعيه واعرض مواهبي في التصوير خخخخ

زوجي كان مستعجل واخدها معاه

يارب تعجبكم وتنبسطو في طعمها

(( عندي ملحوظه صغيره بخصوص الدقيق وقت العجن خلوه بحراره الغرفه

اما لما يكون بارد ومن الثلاجه ما تنعجن تمام وتتطلع ملخبطه

الافضل لها بحراره الغرفه ))

بييس

Mona

Things We Love

العجينة المثاليه

السلام عليكم

بشاركم اليوم بطريقة العجينة دي السهلة والي اعتبرها مثالية بالنسبه ليا لحد الان

واللي ولا مرة خذلتني ماشاء الله ^^ دايما استخدمها في المعجنات والبيتزا بتطلع بيرفكت في كل مره

اخدت الطريقة قبل كم سنه من منتدى اسمه شمواه ومن وقتها اعتمدتها هيا ولا فكرت ادور على غيرها

مقاديرها جدا سهله وبسيطة

نبدء مع المقادير

ملعقة طعام خميرة فوريه

كوب ماء فاتر

٢ كوب دقيق

٣ ملاعق طعام حليب نيدو بودرة

رشة ملح + سكر

غطاء زيت (او بالتقريبي ملعقتين طعام زيت)

وبس هيا دي المقادير ^^

نجي للخطوات 

١/ في وعاء عميق نحط الماء مع الخميره مع السكر ونخليهم شويتين على جنب عشان تتفاعل الخميره على بال ما نجهز باقي المقادير.

٢/ بعد ما نشوف الخميره بدت تتفاعل وفيها زي الفقاعات نضيف باقي المقادير ماعدا الدقيق نخلطهم عالسريع بالخفاقة اليدويه.

٣/ نضيف الدقيق تدريجيا ونبدء نعجن، العجن بياخد معانا شويتين وقت بس ضروري نعجنها تمام وممكن تحتاج معانا شوية دقيق ضيفي على قد ما تحتاجي

حتى تحسيها متماسكة معاكي وما تلزق بإيدك.

٤/ نكورها على شكل كوره وندهنها بشوية زيت وندهن الصينيه الي بنحط فيها العجينه كمان عشان ترتاح بشوية زيت ( انا افضل زيت زيتون)

ونغطيها ببلاستيك بأحكام ونخليها قريب من مكان دافي عشان تتسرع  معانا عملية التخمير ( عن نفسي اخليها قريبه من الفرن) ادفى مكان في المطبخ

حوالي نص ساعه.

بعد كدا لك حرية الابداع فيها زي ماقلت فوق وممكن تستخدميها في البيتزا، المعجنات او تحشيها بأي شي تحبيه… الخ

ملاحظات مهمة

انا استخدم الاكواب المعياريه في كل مره اسويها

الفرن اللي استخدمه كهربائى

لازم الفرن يكووون مسخن قبل و حااار

ما تطول بالفرن بمجرد ما تستوي من تحت حق ١٠ دقايق تقريبا ممكن اقل على  حرارة ٢٨٠  احمرها من فوق عالسريع وانا واقفه عندها

(طبعا كل فرن يختلف عن الثاني في درجات الحراره فانتبهي لدي النقطه)

يفضل ان الدقيق ما يكون بارد ويكون بدرجة حرارة الغرفة

ولما نطلعها من الفرن نغطيها بمنشفة مطبخ نظيفة عشان ماتنشف معانا

وبالعافيه ^^

Ohood

Things We Love