يعني عند باب البيت بتلاقي شنته مرميه.. و بغرفه الجلوس يتلاقي الشنته الثانيه مرميه على الكنباي او الارض .. و الجاكيتات على الارض .. و طبيعي تشوف الجرابات تحت الكنباي .. و تبدأ محاولات امي اليائسه -احيانا- بالطلب منهم انه كل اشي ينحط مكانه.. و لا حياه لمن تنادي .. و طبيعي وين ما كان موقعك بالبيت انك تسمع صراخات بالجمل  التاليه :

 " ارفع جاكيتك عن الارض ، غير ملابسك قبل الغدا ، غسل ايديك و رجليك قبل ما تاكل ، شيل بوتك من الغرفه ، جراباتك مش هون مكانهم .."  و غيرها من الجمل اللي بتنعاد ما لا يقل عن 3 مرات لكي تسمع بوضوح لإخواني..

الله يرحم أيامنا .. حكم دكتاتوري واجب التنفيذ .. اهلي كانو بصحتهم .. ما كان عندهم اشي اسمه دلال زي اللي بينعطى للصغار هلأ .. يعني كنا نعمل شويه معارضه و ما نرضى نرد .. بالإخر بنتبهدل و بنرد .. هلأ اخواني بيمرضوا اذا حطوا كل اشي بمكانه من اول مره ..

المهم بالموضوع ..

 اني شلت شنته اخوي - ثالث ثانوي - عن الكنباي علشان اقعد .. واذ بي انتبه انو الشنته فاضيه .. مافيها كتب .. و المفروض انهم سلموهم كتب الفصل الدراسي الثاني..

و لما سألناه .. قال انه ما اعطوه الكتب لإنه مخالف..

الله يرضى عليه - لابس جينز عالمدرسه و شعره طويل ..

 اول مره بعرف انه الجينز ممنوع بالمدارس...

 و طبعا شعره طويل وموعاجب حدا غيره .. منظره منفر جدا .. بس مش راضي يقصه .. و لما نبهدله بيلبس الطاقيه و بخبيه ..

و ما حدا قادر يمون عليه و يخليه يقصه ..

و الحلو بالموضوع انه من 22 طالب ( عدد طلاب فصله ) فقط 4 طلاب استلمو الكتب .. الباقي كلهم مخالفين - 18 طالب مخالف - اغلبهم شعرهم طويل ..

المشكله انه المدرسه مش اول مره بتعمل هادا الاشي و ما بتسلمهم الكتب اذا كانو مخالفين .. كل فصل نفس الحركه بتسير.. و اخوي ما بقص شعره و بيعطوه الكتب بالآخر .. نظام ماشاء الله عليه صارم جدا ..

 سؤالي .. وين الجمال بإن الشب يكون شعره طويل .. و بالذات اذا ما كان مالس و ناعم ..

 شخصيا بلاقي الشعر الطويل على الشب منظر غير حضاري نهائيا سواءا رابطه او لابس طاقيه ناعم او مكزبر او شو ماكان ..

الحمد لله اخوي لسا ما وصل لمرحله انه يربط فيها شعره .. الله يهديه يرحمنا و يقص شعره ..

.