زبون على قدو: أهلين والله.. الله يزيدك شرف.. المحل منوّر بوجودك..

الشامي العتيق: لك ليش هيك متئّل حالك علينا؟ والله اشتقنالك يا رجل.. إي ما بيصير هيك..

الزبون: خليها لربك.. والله دوبي خلص دوام الوظيفة وبوشي على وظيفة بعد الضهر.. تصدق انو خضرة للبيت ما عم لحق جيب معي؟.. لك ولادي ما عم شوفهم الله وكيلك..

الشامي العتيق: بسيطة.. هاد حال الدنيا، سعي وجهاد وعمل.. إي لكان..

الزبون: بس اليوم خص نص مشان شوفك أخدت إجازة ساعية من دوام المسا.. شلوني معك؟

الشامي: لك من حظنا الحلو يا معلم.. لو تساويها كل يوم نكسب شوفتك الغالية..

الزبون: لك روح الله يسلمك.. لك نحنا الكسبانين معك إي والله.. وبكسر الهاء كمان...... وإنت حبيب.. شو في ما في؟ شلون الشغل والرزء؟

الشامي: والله متل مو شايف السوء دائر.. والحالة صعبة.. بس مستورة والحمد لله..

الزبون: إي والله الحمد لله على كل حال..

وبعد شي نص ساعة من الجمل الجاهزة والمجاملة والكولكة..

الزبون: ماشي.. أنا بدي روح.. بالإذن..

الشامي: لك وين؟ قاعدين.. ما شربت القهوة..

بيصيح عالولد: ساويلنا قهوة يا ولد..

الزبون: والله ما فيني اتأخر أكتر.. خلص مشروبة..

الشامي: لك مابيصير هيك تروح بدون ما نضيفك شي..

بيصيح عالولد: لك يا ولد....

الزبون: الله يخليك.. المرة الجاية ان شا الله.. يالله..... لا يُمل..

الشامي: خلينا نشوفك سيدي..

الزبون: نشوفكن على خير.. يالله بتؤمر شي؟

الشامي: سلامتك حبيب.. الله معك.. مع السلامة..

بعد ما راح الزبون..

الشامي: لك يبعتلو حمى هالرجل.. كل مرة بيجي وبينق عراسي.. وما بيجي إلا لما بدي سكر المحل.. الله يصبرنا على زيارة الشهر الجاية.. لك اشتهيتو شي مرة يشتري شي غرض من عندي.. لا وكمان مفكر حالو دمه خفيف.. وما في غير بيلمّحلي مشان اتواسطلو عند فلان وعلان.. شو هاد يا؟ لايكون خلفتو ونسيتو؟

وبعد شوي بيفتح الدرج المليان مصاري لآخرو مشان ياخد مفاتيح المحل.. وبيسكر الغلأ..

الزبون: يقطع عمرو شو انو بخيل.. لك فنجان قهوة ما سخي يساويلي.. ولا وفوق منا ما بعمرو رد عموبايلو أو تليفونو قدامي... خايف اسمع أرقام الملايين اللي عم يحصلها مشان ما طقو عين قال يعني.. لك الله لا يرزقو إذا هيك.. الحق علي اللي عم زوره واعمل خير واطّمن عليه.. ناس ما بتستاهل..

ويقطع الشارع ليوصل للقهوة ليلعب شي دء طاولة وينفخ بالأركيلة..