قبل كم يوم دخلت مدونة fatosha

وشفت عندها واجب ودخلت وقريت ... وعجبتني صراحتها

وانا بدوري جيت ورديت مستفسر عن الخطوة التالية ...

والظاهر انا محتاج اسأل نفسي دا السؤال قبل غيري ،،

الواجب عبارة اني اكتب كل حاجة سيئة عني

ولا تخافوا ححل الواجب بأحسن طريقة وعاد هذي فرصة الاصحاب والاعداء انهم يحشوا براحتهم

وانا حهز راسي وابتسم واسوي نفسي ديموقراطي ... بس الدنيا سلف ودين هعات كثيرات

المهم هذا اول واجب ليا فاعذروني ان كان خطي مو واضح >>>احس اني سويت زحمة ما سار واجب

طبعا اللي ورطتني بالواجب ... قصدي الي مررت الواجب مضيعة بيتهم

شكر خاص لها :-)

يلا بسم الله :

1/ باااااارد لأبعد درجة ومو شي سهل ان احد يثير عصبيتي او يحمسني لموضوع او لفكرة يعني ممكن واحد يقلي خبر كارثة وارد عليه ببرود ... " مشي حالك ... أو عادي " واذا مرة اتحمست لموضوع قلت " جيد " >>>لاحظو مافي ممتاز ولا جيد جدا وعادي اسمع فلان مات واقول عظم الله اجره ... ارسب في مادة واقول يلا اعوض المرة الجاية ... شعاري في الحياة تيك ات ايزي أو مشي حالك ... حالك يمشي ... واسألو امي كم مرة زعلت مني بسبب البرود الشديد>>>لحد يصدق ويسويها

2/اجد متعة فريدة في استفزاز الناس وتحريك عواطفهم ... يعني اشوف واحد معصب واخلاقو تجارية واروح ارفع ضغطوا ... والحش من احب الاعمال الى قلبي وممكن اكتم قهر ... ألم ... غيظ ... مشكلة ... لكن اكتم المحش ... ما اقدر حتى لو المح من بعيد اهم شي المحش ينقال

3/ أهتم بمشاكل الناس أكثر من اصحاب المشاكل انفسهم واحاول جاهد اني احلها بكل ما اقدر ... حتى لو كان مستحيل اقول بيني وبين نفسي لازم أحلها ومو معقولة مافي حل لكن في نفس الوقت ما احب احد يطلب مني طلب ... لحد يسألني كيف!!

4/ اخر الأولويات نفسي ... يعني دائما قائمة اهتماماتي تبدأ بالاخرين وتنتهي بأولوياتي ... فعادي اخرج على حساب الدراسة وغيرو كثير

5/ أحيانا اجد اني احتاج اكون عنيد بدل الطيبة الزايدة عن اللزوم صح اني ما وصلت لدرجة الناس اللي ما يقدروا يقولو لا ... لكن يعني ممكن احط مخطط لليوم ويخرب بسهولة لأن في طلعة شباب طلعت في الخط

6/ مضيعة بيتها ... " الله يسامحها " تقول عني :

صارخ بصمت ، بدور لك دورة كيف تزيد من دافع الناس اللى حولك ،، انت انسان هدف تحبيط الشخص …
اتوقع انها هواية عندك ..

7/في علاقة مخيفة بيني وبين الفوضى ... لدرجة غرفتي ما افكر ابدا اني اصورها من كثر الفوضى اللي موجودة داخلها

8/ اكبر كوابيسي اني اطلب من احد طلب ... احب اني انفذ اموري بنفسي ... وممكن اموت من الجوع ولا اطلب من احد كسرة خبز >>>فين عايشين ... يعني زي ما تقولو عزة نفس بزيادة

9/ اسهل شي عندي الصاق اخطائي بغيري ... يعني اذا وقعت في خطأ ممكن احط مليون مبرر غيري

10/أكره مظاهر الدلع وخصوصا في الاولاد ... الولد المفروض يكون رجال من صغرو ... وطبعا اي شي ما يعجبني من المظاهر اللي حولي ... على طول ابدأ بالحش ... لكن مو كل شي احشو يعني مو عاجبني

المهم هذا يكفي واللي حاب يزيد ... فيكم الخير والبركة

ههههههههههههههههههه

أمرر الواجب هذا الى ... اممممممم

هذا اصعب جزء في الواجب لان اللي اعرفهم في الورد بريس قليل :-(

نمرره الى أيانق

بما انها من زمان ما استخدمت اصابيعها في كتابة تدوينة جديدة

هع هع هع

الله يكون في عونك يا ايانق على هذا الواجب