وسوم » مسلسل

النهاردة صادفت حاجتين بتوضح فكرة التعبير عن النجاح الشخصي ليك بطريقة تاثر على اللي حواليك وتديهم دفعة كده للأمام وتحسسهم بالأمل..

المثال الأولاني: مسلسل – مش مصري طبعاً – بيحكي عن البطل بتاعه هو وصاحبه زمان أيام الكلية لما كانوا شحاتين وحالتهم منيلة وبدأوا مشروع صغير في أوضة حقيرة معفنة وإختاروا لوجو الشركة الصغيرة اللي بدأوها ورسموه على حيطة مشرخة في الأوضة دي وكل واحد كتب جمب اللوجو جمله أختارها ، صاحب البطل كتب ” you can do it ” وأما البطل مش فاكرة كتب إيه بس كتب حاجة حلوة برضو يعني.. المهم الأتنين دول بعدها ربنا فتحها عليهم وبقوا عندهم شركة كبيرة محترمة بملايين .. وفي نص الشركة دي حطوا فيها الحيطة المشرخة اللي كتبوا عليها عشان الموظفين الشباب عندهم يشوفوها دايماً ويعرفوا إن مفيش مستحيل..

المثال التاني: وهو مثال حي مصري عبارة عن سواق ميكروباص شوفته وانا مروحة من شوية قرر يكتب جملة محددة وواضحة، كنوع من أنواع الرسائل الذاتية الموجهه لجميع طبقات الشعب عشان كل واحد فيهم يعرف من الأخر مصلحته فين، واللي حسيت فيها كمان إنها رد عليا وعلى مؤلفين المسلسل في المثال الأولاني.. والجملة دي كانت ” العنطظة فضت المحفظة ” !!